港產片宣傳要更貼地?

上星期六晚同吾妻去屯門之寶巴倫紐睇《 救殭清道夫》,幾乎全院滿座。完場時ending credit音樂好快完,原來係演員之一錢小豪同製作人員等來謝票,之後喺大堂派宣傳品(貼紙符一張)及同觀眾影相留念。人龍由大堂排出街,幾乎去到老麥外。大家都好開心。

吾妻都有排隊,佢話佢其實對同大明星合照無乜興趣,但要鼓勵吓錢小豪同班辦作人。印像中之前亦有港產片嘅演員去到巴倫紐謝票。(巴倫紐仍然有大嘅戲院大堂,搞謝票活動比對面凱都方便得多。)

我哋老友The Silver Spleen「銀脾」喺劉華套新片《拆彈專家》入面演鬼佬壞蛋,喺佢面書上提議不如大家約個時間一齊入場(完場後大家可以一齊同佢合照!),亦係宣傳(私底下啦)嘅一種。嘻嘻哈哈柴娃娃入場睇戲更開心!另外大家可以去睇睇銀脾對拍呢套片嘅回憶

演員同製作人員落區謝票,直接同觀眾接觸接地氣,係非常好嘅宣傳,值得做應該做馬上做。